ផ្ទុះការរិះគន់គ្រូនៅវិទ្យាល័យតេជោ ហ៊ុន សែន សំពៅលូន ដើរកាត់សក់សិស្សពេញមួយថ្នាក់ទោះបីសិស្សកាត់សក់ខ្លីហើយក៏ដោយ
បាត់ដំបង៖ ហ្វេកបុកផេករបស់វិទ្យាល័យសម្តេចតេជោហ៊ុនសែន សំពៅលូន ល្បីតែមួយថ្ងៃ មានអ្នកចូលខំមិនរិះគន់ជិត ១ម៉ឺនខំមិនក្រោយពីគ្រូនៃវិទ្យាល័យនេះដើរកាត់សក់សិស្សក្នុងថ្នាក់មួយស្ទើទាំងអស់ទោះបីសិស្សខ្លះសក់ក្បាលរាបចង់ដល់លលាដ៏ក្ដី ដោយមិនដឹងមូលហេតុ។
ក្នុងផុសដែលបានបង្ហោះកាលពីថ្ងៃទី២៣ ខែមករា ឆ្នាំ២០២៣ ហ្វេសបុកផេកនេះបានសរសេរថា ការចុះឆកសក់សិស្សនេះគឺជាការ «ចុះអនុវត្តវិន័យ របស់លោកគ្រូអ្នកគ្រូនឹងក្រុមប្រឹក្សាយុវជន» ជាមួយនឹងរូបភាព៩០សន្លឹកពីសកម្មភាពគ្រូម្នាក់ដើរឆកសក់សិស្សក្នុងទឹកមុខយ៉ាងសប្បាយរីករាយ។
មហាជនបានចូលទៅខំមិនរិះគន់ជាច្រើនដោយថាជារឿងមិនអាចទទួលយកបាន គ្រូធ្វើជ្រុលលើស ខណៈមួយចំនួនបានចាប់អារម្មណ៍លើម៉ូតសក់គ្រូដែលថាវែងជាងសិស្សផងមកណែនាំ ដើរឆកសក់សិស្ស។
វិទ្យាល័យតេជោ ហ៊ុន សែន សំពៅលូន ស្ថិតនៅភូមិវាលវង់ ឃុំតាស្ដា ស្រុកសំពៅលូន ខេត្ដបាត់ដំបង។
ទោះជាយ៉ាងណាយើងមិនដឹងថាការចុះឆកសក់សិស្សប្រុសពេញមួយថ្នាក់នេះដោយសារមូលហេតុអ្វីឱ្យពិតប្រាកដនោះទេ៕